Que ben o pasamos o luns!

Aquí tedes unhas fotos do evento.

Últimas novas

Xa temos logotipo!
En breve poderedes velo xa aquí colgado e tamén vos avisaremos da entrega de premios. A selección do traballo gañador foi moi difícil, noraboa a todo/as participantes pola calidade das súas obras.
Para pechar o círculo de lecturas que iniciamos hai uns meses con outra obra gráfica, escolleuse como última lectura deste curso Os lobos de Moeche, de Manel Cráneo. Poderedes recollelo o próximo venres, no lugar de xuntanza habitual.

Hoxe e mañá estamos votando o logotipo do club

Pasade pola Sala de Xuntas, onde están expostos os traballos.
Recordade que imos celebrar un Mercado de libros de segunda man a semana do 9 ó 13 de maio. Traede os que teñades en bo uso, pero xa non empreguedes e que poidan resultar interesantes para outras persoas.
O día 2 de maio temos a convivencia co Club de Lectura Guntín e co Club de Lectura de Allariz, ide preparando a equipaxe de lecturas para comentar.

As novas lecturas

A seguinte lectura para os de 1º e 2º é Usha de María Reimóndez, finalista do Premio Merlín 2005. Unha novela emocionante que reflicte unha realidade cultural descoñecida para moitos: Uxía, Usha para os seus amigos, escribe o relato da súa estancia en Devastana, unha vila do estado de Karnata na India, onde pasa longas tempadas acompañando a súa nai, membro dunha ONG que traballa en proxectos de cooperación.

Pola súa banda, os maiores do club lerán Una habitación en Babel de Eliacer Cansino, Premio Nacional de Literatura Infantil e Xuvenil 2010. En palabras do autor: 
"Babel é un símbolo da confusión. Na novela hai conflitos entre os propios adolescentes. Son conflitos de celos e de integración no grupo. E logo están os conflitos sociais provocados pola pobreza, a incomunicación e a delincuencia, que é probablemente o grao máis alto da marxinación".





 Inés y la alegría, de Almudena Grandes (lectura para os adultos) é unha obra que, baseándose nun feito real ocorrido na metade dos anos 40 (a invasión do val de Arán por tropas antifranquistas), novela as vidas de distintos personaxes de ficción, entre elas a que lle da título á obra, durante o período comprendido entre o final da IIª República e a recuperación da democracia en España. O peculiar estilo narrativo da autora nesta historia, primeira do que denomina ela mesma "Episodios de una Guerra Interminable", e a continua desorde cronolóxica, fan que esta obra levante paixóns encontradas entre os lectores.

Avisos varios

Xa estamos lendo novas lecturas: Usha, para o grupo de 1º a 3º de ESO; Una habitación en Babel, para o grupo de 4º ESO e Bacharelato, e Inés y la alegría, para a sección de adultos.
Imos comentalos todos antes das vacacións de Semana Santa: en concreto, Usha, o luns 11 de abril, Una habitación en Babel o venres 15 de abril, e Inés y la alegría o xoves 14.
A principios de maio celebraremos o día do libro, con distintas actividades no centro, entre elas terá lugar un mercado de libros de segunda man. Ide revisando os que  tedes na casa!
Tamén vos anticipamos que o día 2 de maio haberá unha saída dos membros habituais do Club de Lectura, na que participarán tamén lectores e lectoras doutros dous clubs de lectura: o de Guntín e o de Allariz. Vaia festa de letras imos ter!

Por certo, a semana pasada houbo unha reunión para comentar Barro de Medellín, e a anterior, xusto antes do Antroido, O único que queda é o amor (neste caso os rapaces maiores).

Aquí podedes ver a sección de adultos, na xuntanza de onte, na que se comentou O único que queda é o amor, e se determinou que a seguinte obra de lectura para este grupo será Inés y la alegría, de Almudena Grandes. Os que teñades exemplares deste libro, achegádeos ó centro para prestarllos a outros lectores.

Un feixe de cousas

Estes días están tendo lugar no centro varias actividades para conmemorar o Día da Paz; hoxe, en concreto fíxose un recital de poemas elixidos por dita temática, e, ademais de participal nel profesores e alumnado, viñeron a acompañarnos varios poetas do Círculo Poético desta cidade.

Mañá terá lugar, despois do segundo recreo, a lectura teatralizada da obra "Pic-nic", no Salón de Actos. Non vola perdades!

Onte, por certo, tivo lugar a sesión de lectura en inglés, na que comentamos o relato "Penance" do libro proposto nesta lingua, e varios membros do profesorado comprometémonos a ler algún máis nos próximos días.

Aínda estades a tempo de entregar as vosas propostas para o concurso de logotipo e título deste Club de Lectura; lembrade que o prazo de entrega remata o día 3 de marzo.

Tamén podedes achegarvos ata a aula nº 7, lugar de reunión habitual o próximo venres, no segundo recreo, que imos rematar o taller de versos acrósticos para colocalos nun mural no taboleiro grande da entrada.